 |
РОДНЫЯ ВОБРАЗЫ
|
|
Вобразы мілыя роднага краю,
Смутак і радасьць мая!..
Якуб Колас
|
|
|
|
|
|
|
|
|
|
Сумным і невясёлым
Сваім шумам калосьсе
Мне гаворыць, што восень
Прыйдзе хутка у сёлы.
Змоўкне лес, як калісьці...
А ў гушчарах, у нэтрах
Зазьвініць у паветры,
Ападаючы, лісьце.
Толькі ў гэта ўсё неяк
Мне ня хочацца верыць,
Бо міне гэты шэры
Дзень, як рэха жалеек.
I хоць сёньня так востра
Баляць рукі і ногі,
Папрыходзяць з астрогаў
Браты нашы і сёстры.
І на пасеках чорных
Лес падымецца гонкі,
Загамоняць сасонкі
Перашумам зялёным.
Хай сягоньня панура
Звоняць нашы напевы, –
Часам песьні і дрэвы
Заціхаюць прад бурай.
1936
|
|
|
|
Падабаецца
Не падабаецца
|
|
|
2009–2020. Беларусь, Менск.
|
|
|
